ملك أحمد زاهر تخضع للعلاج النفسي بسبب…”أزمة ثقة”

كشفت الفنانة ملك أحمد زاهر عن الصعوبات التي واجهتها خلال تجسيد شخصيتها في مسلسل “أزمة ثقة” .

وقالت ملك عن الشخصية خلال لقائها في برنامج “واحد من الناس”: “الشخصية على الورق خطيرة بس أنا اتخضيت وكنت قلقانة وخايفة كنت بسمع زمايلي وأساتذتي لما بيبقى عندهم مسلسلين هيخلص أودر يطلع على أورد يقول أنا أعصابي هتبوظ أنا عندي شخصيتين في نفس المشهد هطلع من دي لحالة دي والاتنين مختلفتين تماما”.

وتابعت ملك أحمد زاهر: “قعدت شهرين قبل التصوير أروح لدكتور نفسي ومدرب تمثيل، كنت خايفة أوي لأن دي حاجة نفسية وطبية وممكن يبقى في دكاترة بيتفرجوا أو ناس مروا بتجربة أو عندهم حد مر بحاجة زي كده يتفرج يقول إيه الهبل دا مبيحصلش كده كنت عايزة تطلع كل حاجة مظبوطة”.

وأضافت ملك أحمد زاهر: “أصعب مشاهد عندي المشاهد اللي فيها الشخصيتين بيكلموا بعض، أنا بحب أوي لما أبقى بمثل مع حد أبقى شايفة عيون اللي قدامي لكن أنا هنا بكلم نفسي وباصة للحيطة ولازم أبص في مستوى معين، وكنت عايزة لكل شخصية منهم تفاصيل مختلفة وكنت عشان أعمل من الشخصيتين بعمل تمارين مع مدرب التمثيل والدكتور النفسي عشان مفيش حاجة تفضل، الشخصية تعبني أوي”.

الجدير بالذكر أن مسلسل “أزمة ثقة” من بطولة هاني عادل ونجلاء بدر ومنة فضالي وملك أحمد زاهر وتامر فرج وإيهاب فهمي وهاجر الشرنوبي، والمسلسل من تأليف أحمد صبحي، وإخراج وائل فهمي عبد الحميد، وإنتاج رشا عصفور “توجيذر” وإبراهيم الصاوي “جولدن ميديا”.